李八方online︱深水埗區議會換民政專員 民主派對新人不予厚望
民政總署區議會民政專員黃昕然李國雄
深水埗民政專員李國雄過去一年同區議會擦出唔少「火花」,雖然深水埗專員一職將由環境局首席助理秘書長(能源)黃昕然接替,但唔少民主派議員都對新專員不寄厚望。政府新聞處圖片
過去一年,各區議會都投訴遭民政事務局、民政總署冷待,民政事務專員帶頭離場、拒絕支援區議會會議屢見不鮮,而深水埗民政專員李國雄過去一年都同區議會擦出唔少「火花」,雖然深水埗專員一職聽日(14日)由環境局首席助理秘書長(能源)黃昕然接替,但唔少民主派議員都對新專員不寄厚望。
聽日履新嘅黃昕然,99年加入政務職系,曾經喺多個政策局工作,包括前政制局、前衞福局、香港駐柏林經濟貿易辦事處等,調任專員前係環境局首席助理秘書長(能源)。
現任專員頻拉隊離場 國安法12港人大灣區明日大嶼唔傾得
睇返李國雄過去一年,同民主派為大多數嘅深水埗區議會認真多火花,試過民主派提出動議反對《國安法》時拉隊離場;又以不符《區議會條例》為由,拒絕討論12港人事件、「明日大嶼」同大灣區投票權等議案,緊遵局方「聖旨」。
公民黨美孚北區議員李俊晞自言對李國雄冇特別評價,但指對方任內出現撥款審批時間長、拒絕支援區議會會議等問題,包括疫情下拒絕支援區議會進行zoom meeting。李俊晞話佢唔識新DO黃昕然,但慨嘆換乜人都冇分別,「可能只會更加差」,因為上頭民政局、總署已經有晒指令,僅存嘅一絲希望只係:「上面落order,佢(黃)自己可以睇吓係咪做到足」。
深水埗區議會副主席伍月蘭就話,李國雄同區議員一路都冇乜溝通,「唔係合作伙伴的態度」,希望新DO可以抱持合作態度一齊做好社區,特別係按以往慣例,每次大會後安排正副主席、委員會主席等與不同部門代表開會跟進地區事務,起碼執返正呢個問題。
-----------------------------
-----------------------------