大商場啲宣傳推廣活動，排山倒海咁嚟，直情想吸盡市場嘅消費力，拆售咗嘅細商場係咁捱打都唔係辦法，惟有諗計進行反擊戰啦。觀塘商場裕民薈U-Mall，大業主今個禮拜六會搞個「十萬九千七」大抽獎，實行用真金白銀嚟同大發展商爭過。
美聯營業經理吳志偉話，只要喺場內買滿五十蚊嘢，可以參加抽獎，除咗100份禮品外，大獎係價值10.97萬嘅黃金，名額一個。呢招夠晒實際，分分鐘等於普通打工仔大半年糧，到時個場肯定迫到爆。

參加抽獎截止時間係當日下晝四點，之後會由藝人安德尊做抽獎嘉賓。
裕民薈U-Mall前身係裕民中心商場一層半樓面，由楊姓投資者購入後，趁舊年商場拆售熱潮時，間細做180個舖，面積40至300呎，拆售至今共賣出近七成舖位，呎價由萬二蚊起，平均兩萬蚊一呎，單位最平70零萬。
個場舊年12月開始招租，呎租60至100蚊，租出逾九成，只係有10個吉舖，租戶多係售賣時裝、潮流飾物、化妝品、電腦維修同遊戲機店等。吳志偉預計，呢個送金活動可以令商場人流量比平時嘅周六多兩成。
電郵地址：[email protected]