最近頻頻擺街站狙擊港鐵，促請立法會10月復會後運用特權法調查沙中綫醜聞收集巿民簽名嘅劉小麗，噚日現身要求運房局局長陳帆下台嘅遊行時，八方同在場戰友見到佢面部有瘀傷（圖），班戰友紛紛上前慰問，包括盛傳會做佢九龍西補選「Plan B」嘅工黨李卓人，同埋問佢究竟發生乜事？

刮痧醫鼻竇炎

劉小麗同八方講，佢話由於最近幾個月落區工作辛苦，諗住停一停醫治鼻竇炎，就喺前日接受咗類似拔罐嘅傳統「走罐」療法。小麗慨嘆，其接受治療前醫師已講明，「起碼幾日唔可以見人」，因為面部刮痧後，起碼要3日先會散瘀，點知佢唞咗兩日後，港鐵即爆出高層大地震離職消息，令佢想等多日先見人都唔得。雖然塊面瘀咗，但小麗就話塊面一啲都唔痛，仲讚呢種傳統療法真係好有效，令佢鼻塞即刻通番唔少。而小麗仲喺示威期間化身「地獄廚神」，炮製咗味豆腐渣炒芝麻糊畀陳帆同馬時亨食，諷刺政府同沙中綫係「芝麻糊政府，豆腐渣工程」後。不過八方希望佢為市民出力之餘，亦可以早日康復啦。