清水心跳訪港名單曝光！南華今年繼續承辦亞洲超級球會挑戰盃（即賀歲盃），除咗搵返前英超舊將基士文會返嚟助陣夠晒「綽」之外，球迷最關注嘅，仍莫過於最孭飛嘅日聯球隊清水心跳會唔會強陣訪港。
我求大俠噚日終於收到「少林寺」獨家消息，今季以第10名完成聯賽嘅心跳，將肯定「夫添」壓境（見附表），球迷總算可以鬆一口氣；除咗前阿仙奴中場龍格保（左）、前國腳小野伸二（右）及高原直泰外，上緊位嘅新進25歲國腳岩下敬輔、球隊首席射手大前元紀都會隨軍來港賀歲，大年初一（23日）喺大球場壓軸惡鬥南華，且看首次訪港嘅龍哥勁，定係回巢嘅文仔醒！

清水心跳訪港名單

門將︰山本海人、碓井健平、櫛引政敏

後衞︰平岡康裕、太田宏介、岩下敬輔、辻尾真二、保斯拿、莊亞賓、村松大輔

中場︰龍格保、小野伸二、杉山浩太、枝村匠馬

前鋒︰高原直泰、大前元紀、高木俊幸、伊藤翔、鍋田亞人夢、保斯基

資料來源︰南華足球會