葛民輝今日喺科學園，為一連6場嘅「我們正在」音樂節擔任壓軸表演嘉賓，佢一出場就獻唱台灣男歌手林志炫嘅《花房姑娘》，何韻詩現身台邊用電話拍片，觀眾興奮投入，阿葛以半咸淡普通話講：「多謝大家來到這裏，我是葛民輝，歡迎大家高聲歌唱。」

阿葛指今日係自己同樂隊Tat Flip組成5220伴唱樂團成軍後首日出騷，佢話：「我早前收到何老闆嘅電話，佢問我12月有咩搞，我話我失緊業，佢話我搞個音樂節，我話你真係好沙膽，我連do re mi fa so都未搞清，你都夠膽搵我。今次本地樂壇有救啦，係神嘅召喚！我哋呢啲獨立歌手，得到最高領導人嘅關照，所以我就要求喺現場到錄我哋第一首歌。」

阿葛仲話Tat Flip成立20週年，自己就成立52週年，「我知道佢哋（大會）喺台灣邀請閃靈但係嚟唔到，所以今日我哋5220就嚟，我哋個頭炮作品就係叫做《豆腐火腩飯》，因為知道佢哋另外有對勁嘢叫雞蛋蒸肉餅。」阿葛更笑指現場收音嘅碟名叫《我們正在豆腐火腩飯卡拉OK good leg大碟》。

精選娛聞，喺晒《娛果》
http://fb.com/appledailyent