白健恩（小白）與紹榮鋼鐵創辦人龐鼎元孫女龐寵貽，一齊出席環保慈善三項鐵人賽記者會，小白仲會同亞洲女子健美錦標賽銀牌得主何安娜一齊參賽。

小白話自己平時都有跑步，所以自己會負責跑步5公里，佢又話今次係為「香港骨髓基金」籌款，希望大家可以多啲關注血癌咁話。嚟緊會拍一部獨立電影嘅佢話，自己會扮演一個有多重性格嘅專業人士，仲會同DaDa盧頌之合作。

至於主辦嘅龐寵貽就話，今次除咗家族公司之外，好彩環保園都大力支持場地。佢又話公司拍擋係精英運動員，佢哋除咗喺香港搞三項鐵人比賽之外，亦都會去外地擔任裁判，仲會趁機會吸收人哋辦比賽嘅經驗拎返嚟香港。