陳家樂今日喺商台繼續宣傳劇集，佢話平時電影宣傳多數係上映前1、2星期做，不過今次做咗成個月宣傳，笑言有啲唔慣：「因為o依家係工作中間抽時間出嚟宣傳，原本係休息嘅，變咗自己要爭取多啲休息。」

陳家樂仲話啱啱開完30個鐘拍廣告，所以頭先接受Do姐鄭裕玲訪問有啲緊張：「Do姐出名轉數快，好彩都OK。」佢話屋企人同女友都好支持套劇，同女友仲會討論下：「佢有話我演得討好，但技術程度係低。好多時啲情緒接得唔夠好，佢會留意到。」佢仲話好開心，因為會同成班新演員一齊討論下演戲：「游學修、林耀聲、廖子妤、談善言，我哋成日都出嚟傾下偈，好似新人同學交流會咁。」

陳家樂話月尾會拍攝電影，戲中會飾演賽車手：「其實我手車好渣，有時喺鬧市泊車，正常要3手，我都要4、5手，即刻畀後面啲人呠。」陳家樂仲話自己上年撞過車，所以都有少少緊張：「惟有操多啲車，要學下點樣型啲。」

精選娛聞，喺晒《娛果》
http://fb.com/appledailyent