當年今日
關於我們

【獨家】爸爸馬房屢創佳績 告東尼細女:冇全心奉獻唔會成功

蘋果日報 2017/02/26 00:02

告東尼AntoniaGuavaPass

香港傳奇練馬師告東尼戰績輝煌,練馬師生涯累積超過1,100頭馬,又訓練出香港馬王「精英大師」、極具前途的「巴基小子」等等,告東尼敬業樂業工作態度,對回流香港主理健身運動平台GuavaPass嘅細女Antonia影響深遠。
Antonia一家團結,不時見到成家人現身馬場支持爸爸告東尼,而喺Antonia眼中,爸爸絕對係位英雄:「未見過其他人好似爹哋咁勤力,咁多年都係凌晨4點起身,對佢職業好認真,會將佢呢份精神擺落工作到,冇呢啲勤力、全心奉獻係唔會成功,佢會教同鼓勵我工作唔好放棄,要諗辦法解決問題,呢個都係我哋家庭核心價值。」
父親係傳奇騎師、練馬師,Antonia回憶小時候見識過父親辛酸:「嗰時覺得佢生活幾慘,我5歲喺英國,佢成日車我哋去每一個馬場,望住我哋食飯,佢要保持體重,完全食唔到嘢,又要成日去桑拿出汗,生活真係好極端,所以我哋真係好幸福。」
雖然對爸爸讚不絕口,不過Antonia都笑笑口補充一句學不到他挑戰體能的鬥心:「爹哋幾惡,佢做老闆要strong,個團隊請最好嘅人,唔會浪費時間做錯嘅事,我都試過,同事做唔到,會叫人搵過第二啲嘢做,要嚴格啲,唔好浪費時間。」
採訪:梁錦雯
錄影:李祉澄
場地:Ursus Fitness