當年今日
關於我們

帥位傳不穩 高路普不忿:係咪要我買曼聯波飛先安樂?

蘋果日報 2017/09/29 22:40

利物浦高路普

利物浦呢排狀態認真一般,歐聯兩場都和波,聯賽又畀曼市雙雄騎住,主帥高路普面對嘅壓力認真唔小,有個別球迷仲叫佢落台添。利記將會喺周日晚作客紐卡素,高路普喺賽事記者會就好有霸氣咁回應批評,話:「我冇興趣討論嗰啲批評,嗰啲只不過係人地嘅意見。如果其他隊好勁,係咪要我地放棄,仲要講句『oh my god,我要買曼聯張季票』咁先至安樂?我淨係想人地知道,利記並冇失去踢好波嘅能力。我哋可以做嘅,就係用我哋嘅方式繼續前進。」
現場又有記者提到利記嘅把握力問題,高路普就將全部野入晒自己數,佢仲好幽默咁話:「我哋要保持信心,依家嘅目標就係要做得更好。關於入波嘅問題,我哋冇理由只係將問題歸咎於埋門能力,主要嘅問題係創造力同埋球員本身嘅能力有冇得到發揮。呢個係我嘅責任,但係我冇可能落到場射波!」