香港長跑天后姚潔貞月初歷史性達標，有機會出戰出年里約熱內盧奧運，返港唔夠半個月又有新搞作喇！噚日佢同老公陳家豪出席香港街馬記招，透露計劃變身領跑員，帶住蒙眼嘅家豪出戰五公里賽，身體力行支持傷健跑手。
今屆香港街馬九月六日喺中環龍和道舉行，噚日賽會請咗長跑夫妻檔陳家豪、姚潔貞，同埋另一位港隊氣袋紀嘉文出席記者會。以往家豪同潔貞一齊比賽，都係分開男、女子組衝線，今次兩個就計劃拍住上，由潔貞帶領蒙住眼嘅家豪跑五公里，支持猛龍隊一班視障跑手。
家豪噚日戴住個青蛙眼罩，諗住提早實習一下，點知領跑帶就拎得太高，猛龍隊嘅代表都忍唔住提佢。睇嚟比賽前，呢兩位跑界猛人都要惡補一下。

跳遠王子今望破港績

講番月初潔貞出戰布拉格馬拉松，歷史性達到出年里約奧運標準。其實賽前佢已經有腳傷在身，好彩傷勢已經慢慢好轉，可以慢跑同游水，希望趕及下個月去武漢出戰亞錦賽，同埋八月轉戰北京世錦賽。
另一邊廂，港隊一行32人已經飛抵台北，準備參戰中華台北國際田徑邀請賽。除咗男子4x100米接力隊今日喺預賽登場，仲有跳遠王子陳銘泰出戰決賽，力爭打破7米73嘅香港紀錄。