馬德里體育會前鋒魯爾占美尼斯，因為瞓過龍搭唔到上星期五飛去英國嘅班機，錯過咗韋斯咸嘅體測，外借去呢支英超球隊嘅交易亦因此告吹，不過佢嘅經理人文迪斯已經同賓菲加傾緊，呢位墨西哥前鋒好大機會轉戰葡超。

據西班牙《阿斯報》報道，占美尼斯同槌仔原本乜都傾好晒，仲安排咗上星期五體測，點知佢因為瞓過龍錯過咗飛機，唔能夠如期體測，交易當然唔成功。不過，賓菲加就希望可以簽入上季加盟馬體會之後受到冷落嘅占美尼斯，準備出100萬歐元（約850萬港元）買入佢一半擁有權，並且會分擔佢喺馬體會嘅一半人工，而呢宗交易相信日內就會有公佈。