「家是香港」聽個名已有一陣八十年代out味，似足當年港台宣傳口號，林鄭做地區在新市鎮公屋負責成立互委會MAC時代嘅slogan，加埋個超老土logo，真係以為時光倒流。政府將大小活動均納入「家是香港」運動中，表面好似搵嘢嚟搞，實質就係令梁班子獲得大量曝光宣傳機會，因為但凡獲冠「家是香港」之名，政府都會派出官員出席活動作主禮，乘機籠絡地區人士、街佬社團，司局長也可以大發噏風上鏡。
但呢條屎橋也有負面效果，在本地中產主流眼中，建制派政黨，尤其深紅組織，屬老土落後生產力，活動模式也與中產主流脫節，挺梁集會中竟然仲有扭秧歌大嬸團，問你死未？群眾老化，活動不離曲藝、書法、朗誦比賽。過往港英時代，政府官員自我定位是進步及現代化力量，政務官乃社會精英，中產文化口味，出任藝術節、電影節、港芭港樂patron、Cancer fund籌款主禮，點會同紅色群眾庸俗工農兵文藝活動搭上。
香港商界、專業精英之所以認同殖民地管治，除咗共生實利之外，仲有文化上之認同，以西方文化品味為坐標。回歸後特區政府政治上依靠親中政黨，但董建華總算來自洋化的上海世家大族，而非紅色土幹部，曾蔭權更崇英崇到出面。到梁振英上場，西環治港、巿委書記治港之說已甚囂塵上，佢本應摵甩那陣左派out味，扮回歸中產主流，出席法國5月文化活動。殊不知此人政治水平甚低，搞出個「家是香港」運動，將整個政府形象與老土過時之地區左派綑綁一齊，自我染紅。
我真係好希望睇到「家是香港」運動大旗手，兼家人全在英倫之林鄭司長，與愛字堆工農兵造反派代表陳靜心、陳廣文及高達斌，一齊在台上為新界總商會、屯門、元朗區議會合辦「家是香港」愛國愛港曲藝比賽啟動儀式主禮！
添馬男