好快又到特首競選，阿爺照唔照住煲呔，就要睇吓佢生唔生性，喺冇乜重要政績之下維持高民望，如果有一日民望泡沫爆破，跌到唔合格，煲呔恐怕成為老董二號，傳染咗腳痛病連任不成。
咁想搞好民望除咗要靠港大嘅鍾庭耀同中大嘅王家英之外，最緊要靠傳媒幫幫手。唔知係咪為咗𠱁掂傳媒朋友，煲呔同曾太已經答應六月二日出席記協晚會，幫記協籌款，乘機巴結吓啲傳媒啩。
回歸之後，老董喺九八年就第一時間以特首身份去過記協晚會，煲呔喺五年前曾經去過一次。
八方記得，老董當年仲喺記協Ball晒冷，叫晒所有局長去，仲號召每個局長捐一萬蚊畀董太唱貝隆夫人隻《Don'tcryformeArgentina》同日文歌籌款，董太又捐咗個手袋出嚟拍賣，後來有人媽叉董太唱日文歌政治唔正確，貝隆夫人老公死咗，好彩老董都係腳痛啫。
煲呔咁講團隊精神，就更應該帶晒三司十一局出嚟，𠵱家經濟好咗，問責高官應自動獻身，每人包番一圍枱（每圍兩萬有找），曾太就練番首《沒有共產黨就沒有新中國》，籌到款之餘，又可以幫老公連任加分。

成日當富貴黨係水魚

不過八方就問過特首辦，佢哋話，煲呔唔會好似去曾鈺成辦事處咁帶高官嚟，因為啲官去曾鈺成度係有邀請，但係到𠵱家為止，冇其他官收到記協嘅邀請。嘩，記協咁大細超，只係請特首又真係有問題。
睇返過往紀錄，記協嘅晚會從來唔多吉利，啲嘉賓去完之後冇耐，唔係腳痛下台、辭職、就係差啲辭職，近嘅就有醫管局前總裁何兆煒，上年去完記協晚會，第二日即刻宣布唔撈，遠嘅就有偷步買車嘅阿松，差啲辭職嘅就係九鐵主席唔使講啦。
八方聽聞，除咗公民黨啲大狀（個個去完記協Ball都做晒議員）唔係個個都咁樂意接受邀請，前幾年就試過成個自由黨冇人肯受邀請，當時流傳話，晚會啲主持成日當富貴黨係水魚，年年都勁鋸富貴黨，要佢哋捐錢買埋啲唔等使嘅嘢，搞到富貴黨好唔高興。

傳真︰2623-9278
電郵︰[email protected]