蘇施黃今日路經九龍塘嘅又一城，其間見到慧妍雅集舉行活動，佢就好有心咁停下來支持活動。

提到密友金燕玲奪得金像獎女配角，佢就話會以減肥為金燕玲慶祝，蘇施黃話：「我答應佢減肥，現時係全盛時期152磅，我又矮又肥 ，金小姐成日咁嗌我 ，仲話點解會鍾意個咁嘅人。」蘇施黃仲笑金燕玲保持體態跳舞太娘，唔會去一齊跳，接住話：「佢成日都驚我死得早過佢，我O依家咪駁長啲條命囉，佢咁叻攞咗金孖玲（指攞兩次獎），我應承送番啲嘢畀佢，就係減肥，不過未知點減，我從來都唔會做運動，只會做口部運動，當晚攞獎後我哋返到屋企，我食咗海南雞飯，當時只係食七成飽，點知瞓瞓下覺，個肚咕咕聲，金小姐問我係咪放屁，又問我要唔要食朱古力， 我話唔洗，後來個肚又咕咕聲 ，佢又問我使唔使食麵包，真係魔鬼嚟，我話no no no。第二日有朋友搵我食自助餐，我唔記得咗減肥應承咗，之後我哥哥就打畀我，話知道我會忘記咗減肥件事，專登搵咗個營養師畀我，仲話我係要付出少少金錢，就會記得減肥，所以我聽日會去見營養師。」

講到佢嘅減肥目標，蘇施黃就話由152磅減到140磅，要搣甩12磅，佢話減冇問題，keep先喺個大問題。