踏入2007年兩個禮拜，股市日日危危乎，之但係仲有好多散仔（散戶）夠膽入貨，仲有人話至緊要唔好俾大戶嚇走，其實散戶應該用咩心態去炒股呢？
TOPWAI威威前幾日喺《Uwants討論區》鋪咗個散戶心態8宗罪同大家分享，佢列出散戶炒股損手，全因抱住以下8類心態：
有貨望市升，冇貨望市插；
升時唔敢追，跌時唔敢買；
賺時唔放，蝕時死攬。
其實呢8宗罪，咪即係：唔肯止蝕、溝貨、聽消息唔分析、鍾意拗頸、識小小以為天下無敵、夠膽輸唔夠膽贏、炒自己唔識嘅股，同埋賭癮大無貨喺手會身痕，無無聊聊都要買啲！至於其他網友點睇？好多人都話自己中晒，係散仔之中嘅散仔，似乎大家都好有自知之明。

有耐性都要識揀股

咁投資心態最重要係咩？絕大部份網友認為係經驗、耐性、EQ同埋運氣；但要記住凡事有例外，好似隻電訊盈科（008）咁，虎標活絡油話：「止蝕重要，有耐性而唔止蝕唔得㗎！8號仔有辦你睇。」LessIsMore2亦認為，「如果你手上有8號仔……你同佢鬥耐性就死得人多。」
至於想贏錢，將軍澳燈王話：「耐性，但睇錯要認，唔好同錢過唔去；冷靜，但真係要做就做，唔好猶豫不決亦唔好後悔；遵守紀律，小原則可以因時制宜，大原則一定要遵守；危機意識，唔係就無辦法控制自己嘅貪念。」
JohnLuk最直接簡單──「唔好信二流分析員！」