近日大市波動，一些跌幅驚人的落後股波幅就更大，例如周三獲瑞銀調高評級的馬鋼（323）及鞍鋼股份（347），竟然單日急升25%及16%。
瑞銀雖調高評級，卻未見有唱好公司前景的言論，而是詳細分析馬鋼及鞍鋼在產品結構和生產成本上的缺陷，上調投資級別只因兩股估值廉宜。瑞銀將馬鋼評級由中性上調至買入，目標價卻下調19%至3.29元；鞍鋼更連跳兩級由賣出改為買入，目標價下調21%至6.40元。好明顯是分析員之前睇錯了，唔係點會原目標價同未升前股價差一大截？
急升過後，鞍鋼A股在上周五收市後發表通告，稱該公司預期今年首9個月收入按年大減91%至2.39億元（人民幣．下同），即第3季度盈利僅1900萬元，比上半年形勢更惡劣，若第4季內地工程無起色，鋼價又持續低迷，隨時要蝕錢收場，到時就變成冇得計PE之股票。

根據瑞銀的報告，分析員認為現時鞍鋼估值已近08年底。公司於10月1日宣佈延長工廠及設備的折舊年限，從而降低折舊費用，瑞銀認為此舉雖可在第4季貢獻3.88億元除稅後溢利，卻意味鞍鋼成本壓力甚重。要用到會計手段谷高盈利，鞍鋼縱然價殘亦唔代表抵買。
同樣係博低殘股，揀鋼鐵股既有機會揀着蝕錢股冇息收，倒不如吼更低殘的內房股，起碼外圍經濟差就有機會博中央調控鬆手，事實上中國上周公佈的貿易數據，顯示外貿正急劇放緩，再加緊調控樓市整死發展商及各行各業的話，後果可能仲嚴重。合景泰富（1813）大股東今個月以來已連續多日增持股份，呢啲股票至叫值博。
歐陽風