周大福珠寶（1929）舊年年底上市後股價開始走樣，但高層董事嘅薪酬就步步高升。周大福最近公佈上市後第一份年報，董事局15名董事嘅薪酬總數合共9020萬，仲多過彤叔鄭裕彤嘅地產旗艦新世界發展（017）嘅6990萬銀。無他嘅，周大福賺錢都多過新世界，市值又大過你，之但係彤叔乖孫鄭志剛喺周大福嘅全年酬金只得260萬，係八個執行董事之中最少，喺周大福入面淪為低收入群組，唔知有冇乜嘢玄機呢？
周大福話晒都係由彤叔一手湊大，佢支薪多啲都好應該，全年酬金370萬，比起佢喺新世界只𢭃象徵式30萬銀，就知佢喺邊度出力多啲啦！佢乖仔鄭家純都算「克制」，喺周大福總年薪530萬，比起佢喺新世界嘅3140萬少一大截。