今屆香港小姐、賽制同賽果，都並非民選民願，更甚嘅，兩個鐘頭嘅選美節目，竟然俾一個網路媒體平台Apps騎劫，當晚隻大腥腥就喺班佳麗側邊揖揖揚揚，穿穿插插。一年一度嘅選美盛事，竟然變成獎門人Super騷，難怪有網民提議以後將「香港小姐」改為「TVB小姐」會更貼切。

出爐冠軍雷莊𠒇，俾人口誅筆伐插到體無完膚，唔抵得頸嘅雷莊𠒇，就喺IG開live同網民開火，寸網民唔夠聰明。(新聞連結： http://bit.ly/2xNkD8B )烈火遇上滾油，可想而知網民嘅反應會係點。

今屆港姐三甲認受性成疑，又望望一水之隔嘅澳門，有網民就搵咗2017年國際小姐澳門代表嘅麥嘉欣(Sofia Paiva)，唔比由自可，一比之下，真係高下立見。

今年20歲嘅Sofia，係一位土生土長嘅中葡混血兒，除咗有一般歐洲人深輪廓嘅五官之外，亦有東方人擁有嘅甜美氣質。Sofia現時喺澳門聖若瑟大學讀緊心理學系，佢話希望日後能夠成為一位成功嘅心理學家。而Sofia將會喺11月代表澳門到東京參與國際小姐競選。

Sofia日前就答傳媒，話報名參加面試係希望挑戰一下自己嘅膽量，因為自己係屬文靜型，希望今次參選，可以向國際宣傳澳門，展示澳門獨有嘅中葡文化。

而以往大台都會派港姐三甲參加國際選美賽事，但自2015年開始，再冇派獲獎佳麗參加國際小姐同世界小姐，早喺11年，連環球小姐都冇派代表參加，反而機構「澳門選美聯盟」就喺2015年開始，會喺香港同澳門舉行甄選，分別選出香港同澳門嘅代表參加國際小姐選舉，而Sofia就係今屆嘅澳門代表喇！

至於Sofia原來一早封盤啦，男友係澳門藝人沈柏彤(Kelvin)，港男，唔恨得咁多啦。