兩位朋友的口徑一致:唔准寫。而且在「唔」和「准」中間,多了一個唔出得街嘅字,可見他們反對和反感的程度。好一句讓人毛骨悚然嘅「唔X准寫」,香港的言論自由果然非常有限度。 「Marcus哥,唔好玩啦,Susan(假名)唔知你係葉朗程,但係佢有睇你寫嘢㗎,你寫到咁揚,個stag唔使去啦,一齊留番喺香港食手指囉。」朋友一號說,躁咗。然後朋友二號緊接,指着我罵:「你條友唔好咁冇人性啦,咁都寫,認真㗎,寫咗絕交呀。」絕交呢個咁可愛嘅單詞,自從小學畢業之後都冇聽過,連絕交都攞埋嚟講,睇得出,佢真係好驚。 究竟男人去stag party有乜嘢搞,點解我嗰兩位朋友會咁驚俾佢哋另一半知佢哋喺stag party做乜嘢?根據wikipedia的解釋,stag party是一個由伴郎以及兄弟們安排給新郎哥的派對,在婚禮前的那天舉行,目的是要紀念新郎最後一晚的自由。最高興的是,由於這是新郎最後一晚的單身生活,兄弟們都會給新郎哥安排「female company such as strippers」,即是好像脫衣舞女郎這樣的女性伴侶。
竟然為新郎哥安排這樣的節目?這班根本是損友,算甚麼兄弟!No,根據wikipedia的說法,這些全都是兄弟們用心良苦的安排,目的是lead the groom into temptation before the wedding to make sure he is fully committed to his marriage proposal。一句講晒,stag party就是要給新郎哥一個最後考試。Sounds lovely,如果這真是一個考試,我諗所有男人都唔介意無限次retake。 女士們,其實你哋一啲都唔使驚,wikipedia所描述嘅stag party,喺今時今日已經好out。我大大話話參與過起碼三個stag party,聽過嘅stag party奇聞更遠遠超過呢個數,所以絕對有足夠經驗給你說明現在多數的stag party是怎麼一回事。第一,現在的stag party通常都不是安排在婚前一夜的,至少我去過的都不是,聽說因為婚前那天其實仲有好多婚禮細節要跟,所以新郎根本無暇應付別的事情。第二,我去過的stag party都肯定唔只一晚咁少,因為現在都興去個短短的旅行,至少三日兩夜。 有啲男人去stag party唔敢光明正大,有啲就算敢光明正大,都要諗諸多理由同另一半解釋,因為另一半的疑心太重。雖然我係男人,但絕對明白女人點解會起疑心。好些男人給女人的感覺,是甚麼也可以求求其其的。慶祝生日,可以求求其其;過情人節,可以求求其其;除夕倒數,可以求求其其。但你竟然為咗慶祝個friend就嚟結婚,可以勞師動眾搞個旅行,勞師動眾同公司請假,勞師動眾買機票訂酒店,仲要凌晨兩點都唔瞓就係為咗plan好個itin?大佬,你叫女人點唔起疑心呀?