當年今日
關於我們

行人陷阱 - 左丁山

蘋果日報 2003/11/16 08:00


嚡,全香港都唔知幾多行人陷阱,防不勝防,政府有意美化市容,將行人路重新鋪設,英泥路變成階磚路,其意本善,可惜香港啲工人時好時劣,碰啱一啲新手或者冇心機嘅,鋪設階磚時,樣樣只顧「差不多」,不求完美,監工嘅吞pot,收貨嘅側側膊,於是行人就受苦,納稅人枉花金錢。
高佬森講出嘅行人陷阱,女士特別容易中招,如果因而PK,高佬森話可唔可以告政府,要求賠償呢?香港不同美國,相信要控訴得直,並不容易。輸咗官司兼蝕埋時間、堂費,條數就計唔過。怕且因為咁,政府與建造承包商就有恃無恐。或者等到有一日,大富豪嘅千金因踏中陷阱而跣親條腰,控告政府及有關人士,咁做會逼使政府認真地對付承辦商嘞。