隔牆有耳:問號包圍嘉咸街 - 李八方

蘋果日報 2008/03/16 00:00


有逾百年歷史嘅嘉咸街市集俾市建局列為H18重建項目,市區重建有人歡喜有人愁,唔係人人都受惠,中西區關注組噚日連同幾個區議員搞咗個百年市集告急行動,喺重建區內已經拉閘關門嘅吉舖門口貼上大型問號橫額,佢哋指區內好多有特色商戶、小販因為重建被迫走,所以要質問市建局,點解好好一個百年市集,要搞到成為歷史。
關注組成員羅雅寧話,自從重建計劃推出後,唔少業主乘機加租,搞到好多市集攤檔同商舖捱唔住,有一成被迫執笠;另一方面,由於好多居民遷出,樓下商舖因為冇咗街坊客而生意大減,有魚檔生意驟減一半,分分鐘被陰亁。羅雅寧要求市建局可以考慮由「國際都市委員會」提交嘅規劃方案,保留大部份攤檔同戰前樓宇,唔好畀呢個有悠久歷史嘅市集消失。