第74屆威尼斯影展正在舉行，大陸宣揚愛國到非洲嘅《戰狼2》，女主角盧靖姍獲邀參加，不過佢同徐嬌都因「塞船」遲大到，錯過開幕禮行紅地毯機會。

意大利當地時間9月1號，盧靖姍出席威尼斯電影節「電影中的女性與女性的電影」論壇上，盧靖姍講到自己在美國演藝圈打拼時的經歷，自曝曾被導演提出「潛規則」。

盧靖姍憶述：「有一次被一個美國導演叫到酒店喝咖啡，早就聽說過他喜歡玩女人，所以我早早在咖啡廳定下位置。那個導演對我講，『你想成名，但是成名有代價，你願意付出什麼呢？』我說，我不願意做你想的那些，我不是那種女演員。」仲話呢個圈子「骯髒不堪」。

盧靖姍又向女性電影人，尤其是年輕女性提出建議：「有時間還是要多學習。這個圈子是圍繞著business展開的。但只要你強，就不用考慮被潛規則的事。」不過盧靖姍此番苦心之言，傳到返大陸卻引來完全不一樣的反應——大家諗起嘅，係好耐好耐好耐好耐之前，楊冪一次接受專訪，被問到會否主動俾人潛規則時，講笑咁話（應該係講笑嘅）：「如果是張藝謀或者李安，我肯定會去做，而且說實話這樣的男人，他是絕對撐得起你的。」

講番盧靖姍，佢來自香港，係混血兒，英文名Celina Jade，85年6月10日出世，身兼三職：演員、歌手、模特兒，爸爸係美國籍功夫演員Roy Horan，來頭唔細，70年代同李小龍、成龍合作過，包括電影《蛇形刁手》。至於盧靖姍本人，拍過美劇《箭神》（Arrow）同《轟天搶救》（Skin Trade），仲有《戰狼2》。

Celina喺香港土生土長，14歲時曾簽約小室哲哉門下，出過兩隻碟；之後喺倫敦著名學府London School of Economics修讀經濟管理，畢業後先入行。首部電影係08年黃柏高監製嘅《狼牙》，但佢之後唔係喺香港發展，而係北上中央電視台同湖南衛視搵機會。其實佢個樣有啲似Maggie Q，原來佢都曾Maggie Q嘅經理人，希望發展美國市場0架。