人大常委會副秘書長李飛日前出席政改簡介會，泛民為咗向人大落閘封殺真普選嘅決定表示不滿，集體喺場內拉起「抗議中央失信、剝奪民主可恥」嘅橫額，代表民意向京官發聲，點知場內與會嘅建制派卻與民為敵，喺泛民抗議同被抬離時竟然拍手歡呼，有份抗議嘅公民黨郭家麒話見到馬逢國同民建聯陳鑑林，早過保安出手扯橫額，大鬧佢哋「乞人憎」！
當日建制派醜陋表現，令唔少市民好氣憤，八方睇見都扯火，有份被逐嘅郭家麒噚日喺《壹錘定音》節目稱，當日建制派喺泛民離場時拍手歡呼，大叫「阻住晒」、「走啦你哋」，甚至聽到有人話佢哋「可恥」㖭！佢話就算大家意見唔同，都應該互相尊重，仲話當泛民企喺凳上抗議時，有人仲「郁手搖凳、扯橫額」。

扯泛民banner

嘩！拉扯呢家嘢，係內地城管嘅秘技，與會嘅建制派中，邊啲人喺當日展示咗城管嘅一招半式呢？郭家麒點名話呀，見到陳鑑林同馬逢國，早喺保安未出手趕佢哋前，已經率先拉扯佢哋嘅banner，唔明點解要咁做，直指此舉「非常乞人憎」，大鬧「（佢哋）直情係狗，狗到不得了！」
八方噚日問過陳鑑林，為乜出手拉扯banner？陳鑑林否認：「應該冇啩、唔會啩」，反指泛民若覺得個簡介會冇意思，應該杯葛，喺出面請願區抗議就算，唔好滋擾來賓。另一被郭家麒指控嘅馬逢國反駁，「係佢哋張banner揈嚟揈去，揈到我個頭，好乞人憎，我先撥咗佢，嗰啲唔係叫拉扯」，反問：「佢哋滋擾我又點計？」

李八方
mailto:[email protected]