李亞鵬同王菲喺4年前離婚後，即使王菲現已情歸謝霆鋒，但佢同前夫依然keep住朋友關係。(新聞連結： http://bit.ly/2foLVhd )

今年45歲嘅李亞鵬，同王菲婚前婚後都有唔少緋聞，反而離婚後，鮮有聽到感情有著落，見得最多嘅，就係佢帶囡囡李嫣呢度去嗰度去，父女感情唔錯。不過昔日一家幾口同場嘅溫馨畫面，就極少見到。

噚晚適逢嫣然天使舉行慈善晚會，王菲帶咗兩個囡囡竇靖童同李嫣，現身晚宴，同場仲有王菲前夫李亞鵬。全晚嘅高潮，就係晚宴至中途，着住黑色西裝打煲呔嘅李亞鵬，起身走到前妻所坐嘅枱，邀對方到舞池跳舞，而着住露單膊黑色衫嘅王菲，一啲都冇扭擰，即起身同兩個囡囡隨李亞鵬走入舞池。

三母女隨住音樂扭腰舉手擰頭勁舞，之後仲同李亞鵬隨大隊膊頭掂膊頭玩接龍。見王菲開懷大笑，喺現場又攬又摸細女李嫣個頭，又同大女童童鬥舞，雖然同前夫互動相對較少，不過睇得出王菲呢晚應該好盡興。