韓國收費電視台tvN嘅《請回答1988》，噚日播出第五集，收視再刷新高，升到10.145%，再次打破自己嘅紀錄，亦都暫時成為今年收費台劇集嘅收視冠軍，估計呢個幾月都好難有另一部劇集可以挑戰佢。

事實上，《請回答》系列係tvN嘅王牌劇，由《請回答1997》、到《請回答1994》，收視都係超高。0依家《請回答1988》只係播到第五集，外界都睇佢收視會繼續升，仲有望打破之前tvN綜藝節目《一日三餐-漁村篇》保持嘅13.338%收視紀錄。

而之前《請回答1988》嘅演員就話過如果收視超過8%，就會帶女主角惠利去男子高中烤韓牛比粉絲，仲話過18%收視就搞簽名會，估計要達到目標都唔係難事。劇集咁收得，當然最開心就係女主角惠利，因為佢之前就被指係收視毒藥，0依家孭飛嘅《請回答1988》有咁好收視，佢自然飲得杯落。