詹教授指兩年前已發現橡樹有問題,樹冠開始稀疏,已一分為八嘅樹幹亦開始嚴重傾斜,部份樹幹壓爆校長府圍牆,巨型樹枝伸延至大學道行人路,危及途人好牙煙,為免赤柱冧樹奪命悲劇重演,「樹王」不得不忍痛斬樹。
呢棵橡樹亦危及校長徐立之,詹教授指樹根長約30米,影響校長府地基,分分鐘整冧校長府,人命關天,惟有犧牲棵樹。港大校園內中山廣場棵「開心樹」石栗年中被斬,今次再斬印度橡,詹教授話斬樹工程浩大得多,相信係港大創校以嚟最大型同最複雜嘅斬樹工程,因為要逐少將樹幹切割,之後再挖走地下樹根,預計要花成個星期、斥資10幾萬元,港大會要求承辦商將樹幹切粒做有機肥料。