印度電影近年在港都有一定捧場客，由寶萊塢巨星阿米爾汗（Aamir Khan）主演嘅《作死不離3兄弟》（3 Idiots）、《打死不離3父女》（Dangal）等都在港大受歡迎，而佢同在《3父女》飾演乖女嘅薩伊拉華森（Zaira Wasim）再度合作新片《打死不離歌星夢》（Secret Superstar）鐵定下月12日在香港上映，薩伊拉將於4月中襲港配合宣傳，佢仲預告會有位「特別嘉賓」同行。

《打死不離歌星夢》故事講一個少女追尋歌星夢同埋歌頌母愛，又以感人情節打動觀眾，阿米爾汗扮演Chok爆歌星兼音樂人，決心提攜薩伊拉飾演嘅女主角欣兒做樂壇新人，可惜生於小鎮嘅欣兒受到父親反對，加上父親思想守舊，令呢位14歲少女難圓歌星夢，幸好有母親包庇及扶助，女主角最後上戴幪面自彈自唱嘅原創歌曲到YouTube卻意外爆紅。

其實片中女主角嘅動人歌聲，並非由薩伊拉親自唱出，而係找來幕後代唱。呢位幕後女聲名叫Meghna Mishra，薩伊拉拍攝前特別跟Meghna學唱歌，以便投入拍攝當中嘅歌唱部份，而電影在當地上映時，阿米爾汗唔止安排Meghna到戲院大展歌喉，印度亦有節目請佢同女主角薩伊拉齊齊站台，由Meghna一邊高歌，旁邊嘅薩伊拉就即場傳神咪嘴，贏得全場掌聲。

為配合電影在港上映，電影公司都安排港版「神秘巨星」登場，呢位久未發表新歌嘅香港歌手特別為電影獻唱廣東話版主題曲《歌聲如初》，唱出母女之間最單純如初嘅感動，引起唔少網民紛紛猜測呢位「神秘巨星」嘅真身。

精選娛聞，喺晒《娛果》
http://fb.com/appledailyent