娛圈360:我要做o靚模
o靚模日誌--百日維新、90日學好外語、80日環遊世界,要殺入娛樂圈肯定可以更快,72日就可以走捷徑當o靚模升呢做名人,由發掘、簽約、包裝、宣傳、到出寫真拍戲,一條龍服務夾埋不需三個月,仲使乜選港姐、考藝員訓練班?只要你是年輕靚女,熟讀攻略就事半功倍啦! 撰文:蘇芬妮
第1日
叫得o靚模當然要U21啦,21歲樓上讓賢算罷。自問合條件的就Call齊三五知己以背心熱褲長襪踢拖遊MK,星探好少走漏眼。
第4日
過橋抽板例子太多,通常簽o靚模公司一簽都要簽幾年死約,不過發明星夢的,有人簽即刻瞓身啦!
第8日
o靚界女神Angelababy話孖膶嘴是靠拆走牙箍加化妝變走的,要快可以拜會凹凸容醫,不過記得要同時洗腦兼刪除舊相。
第35日
狂接騷冇錢都照做,當然有師姐傍實見報機會都會提高,最重要話頭醒尾切忌行行企企,未紅先驕、恃靚行兇等等全都要戒,以免成為師姐針對目標就聽冇運行。奉獻嬌軀替龍友拍寫真可以儲fans記實要做,甚至穿三點式都冇得sayno。
第42日
初出茅廬,識你阿毛,成名前先得做別人影子,周秀娜做過「翻版阿嬌」又做過「翻版樂基兒」,溝埋一堆都好,最緊要有得撈博見報,慢慢先洗走老翻味道,搵到下個做你的翻版就叫做成功。如無半分明星相都不緊要,天賦身材一樣令人易記兼入腦,不過如今已經去到FCUP寶寶,下個是甚麼CUP數記得跟醫生溝通好。
第45日
前期竣工可上節目如《美女廚房》或參加動漫節見世面。所以話要學番一味撚手菜,又或夠膽着cosplay,否則實無前途。
第50日
橋唔怕屎同舊,最緊要受,得閒儲定與明星的黐頭合照,最好有埋短訊、msn聯絡做證,適當時候唔覺意外洩就實冇衰。
第52日
開番個討論區account,開post自貼照片,再另開xanga寫blog玩facebook為緋聞解畫,四管齊下狙擊電車男。
第60日
o靚模如恒河沙數,你估日日有job接咩!電影首映成為她們的快閃場地,不請自來又如何?簽完名拍完照,趕踩第二場囉。
第64日
明明去沙灘玩都要化行妝,記得練定演技兼學識白鴿眼,以免見報時被揭發望實狗仔隊長短鏡擺甫士就前功盡廢。
第70日
o靚模夢想達成,還不趕快出比堅尼寫真飲頭啖湯?再唔係殺入銀幕、公仔箱,跟明星花旦頂爛市囉。
第72日
位已上,可以暫時收埋身材扮吓清高,不過咪亂許封胸諾言,以免下次博反彈冇得露吓肉。當然有番咁上下級數,都是時候回饋o靚模工場,得閒帶小師妹出吓鏡,幫吓新人又要小心被搶鏡,一句講晒娛樂圈很貪新忘舊,72日可以由長江後浪變前浪,被人風頭蓋過就等住做番普通奀模。
06年7月
動漫Maggie李曼筠以36D身材衝擊動漫節成為龍友至愛,當時仍未有o靚模之稱。
07年8月
Angelababy和JaniceMan(圖)孖住為2%行時裝騷,獲封為o靚界女神。
07年10月
Kama(圖)憑邦民廣告中途殺出,加入搶錢行列。
07年12月
Angelababy率先於電影《破事兒》亮相。
08年1月
JaniceMan拍攝電影《愛鬥大》反應極佳,初見o靚模影響力。
08年3月
周汶錡有感o靚模威脅,揚言性感回歸。
08年6月
周秀娜以翻版樂基兒之名首度與正版同場現身(圖)。
08年7月
Angelababy和趙碩之等出寫真集,橫掃書展。
08年8月
擁34E上圍的ECupBaby劉欣宜(左圖)在動漫節驚人亮相,掀起ECup熱潮。
09年2月
Angelababy和Kama轉戰日本,由MK走進國際。
09年4月
周秀娜於中環鬧市拍收身廣告,當眾脫衣。
o靚模競爭激烈,Angelababy跟Kama因爭寵隔空罵戰。
Rainbow(右圖)和Lavina等先後亮相《美女廚房》。
09年5月
o靚模胸群而出,《夏之盛放》o靚模肉海戰術,將傅穎擯走。
靚女做晒o靚模,港姐面試淪陷。
09年6月
《夏之盛放》o靚模、Anjaylia等8模兵搶先於書展前出寫真集(圖)。
香港青年協會招募50名義工模特兒,竟吸引850人報名。
09年7月
網民在facebook成立反o靚模群組,嚴禁o靚模出席書展。
資料來源:《蘋果》資料室
有o靚模的地方,就有電車男,兩者唇齒相依,次文化堂社長彭志銘說:「呢批o靚模除咗後生,仲肯性感,就咁攞住電子產品、笑容好假咁俾人影。同埋近幾年數碼相機流行,慳番好多菲林錢,造就咗一班攞住長鏡、唔知影嚟為乜嘅電車男去影佢哋,商人見有反應,咪繼續用呢個方法推銷囉。」
對於有網民群起反對o靚模入侵書展,彭志銘表示大多數人覺得她們出賣自己尊嚴,故才被人看不起,他又慨嘆模特兒風光的日子一去不返。