關之琳今晚現身中環，出席時裝品牌舉行嘅大型街頭時裝派對「MOISELLE STOP THE TRAFFIC」，同場仲有熊黛林、琦琦、吳雨霏（Kary）同關心妍等。

之之同好友兼MOISELLE太子爺陳柏熹（Harris）一齊受訪，為品牌設計睡衣系列嘅之之話：「今次係第3個系列，有睡衣同睡衣風格嘅時裝，今次嘅idea係嚟自印第安紅番，每次都希望用一個國家去做嗰一季嘅主題，上次以中東為主題都好成功。」而之之喺謝幕時，因為要行條好長嘅樓梯，中途就差啲仆親，幸好有驚無險。

Harris就話：「我經常都有留意姐姐（關之琳）着衫偏好，有一排佢好鍾意着民族風打扮，希望可以將姐姐鍾意嘅嘢融入番。」

問到之之係咪特別鍾意着民族衫？佢話：「我乜嘢都夠膽試，今次呢個系列，因為自己鍾意滑雪，所以會加入一啲羽絨褸，香港凍嘅時候都有10幾度，所以自己都會着羽絨，咁我就覺得既然自己成日着嘅嘢，點解唔整靚佢呢？」Harris補充話下個月會將之之個系列帶去上海，作為另一時裝騷嘅開幕品牌咁話。

關心妍受訪時就話唔想接太多工作，現時同囡囡生活好開心，一齊上playgroup，又可以見到佢啲蝦碌嘢咁。關心妍又話陀B時食好多菠菜，令囡囡o依家好大力，成日拉郁啲咕o臣，屋企啲家私要小心釘實。有網民讚阿女係小美人，關心妍話：「唔好讚佢呀，爸爸對佢好嚴，好驚佢有公病。」