當年今日

  飛哥爆鍾大Sir打茅波 - 李八方

蘋果日報 2002/03/30 00:00


飛哥李鵬飛噚日喺《頭條新聞》錄影時講笑,揭露咗鍾大Sir(鍾士元)成二十年前嘅一個笑話。話說喺八四年,一班行政局成員由老大哥鍾大Sir帶隊,飛咗去倫敦同英國佬講數。
佢哋當時滿以為英國佬就算唔睇僧面都睇佛面,應該會畀吓面。點知居然俾班英國記者質問,係咪嚟攞居英權,當時嘅外相賀維更羞辱佢哋,話佢哋又唔係由選舉產生,有乜嘢資格代表邊個發言?飛哥慨歎當年唔似𠵱家咁有直選,俾人窒都冇得反駁,結果一行人只好頭耷耷返酒店開會。
當時周梁淑怡多口講咗句,叫鍾大Sir透過香港傳媒向港人呼籲,以得到同意代表住部分港人發言。點知大Sir唔知係咪怕醜唔肯去,於是大家諗住用投票迫鍾大Sir上梁山,但鍾大Sir重絕,一見全體人贊成,就話「投票結果係五五波」。
此言何解?原來鍾大Sir心目中,做領導人至少佔一半票喎。
不過,鍾大Sir當然唔係真係咁茅,最後都企咗出嚟面對傳媒。


E-mail:[email protected]