識講嘢會被讚「語言藝術」，相反講錯嘢，分分鐘被取笑「語言偽術」，大台節目《Ben Sir研究院》中，Ben Sir（歐陽偉豪）同觀眾說文解字，大玩廣東話食字，入肉、啜核又抵死。

體育系出身嘅Ben Sir，好鍾意跑步，佢換上運動裝喺中環海濱跑步，咁跑步速度有快有慢，自然衍生出「奔走行」三個肢體動作。既然係咁，就請Ben Sir同大家講解吓「奔走行」，佢話：「今日介紹腳部三兄弟，奔、走、行，『奔』至快似車，時速90公里，揈到頭髮向晒後，我哋有奔馳。到『走』，速度慢啲，我哋有走鬼，，有老鼠走呀，以60、70公里時速避開啲老鼠，走鬼避開衞生幫（編者按：食環署小販事務隊員），『行』又再慢啲，散步feel，預你罷駛、慢駛時用30、40公里，躝吓躝吓，腳步三兄弟就係咁去走遍人生。」

Ben Sir逐粒字解「奔走行」，有埋比喻同配詞，簡易明白，但讀呢三粒字，Ben Sir教落一定要發音正確，一旦.....有懶音，就會鬧出大笑話，尤其男士真係要讀得字正腔圓。Ben Sir強調發音：「『奔走行』要留意讀音，拼埋一齊讀要好小心，尤其注意『走』字係第二聲，『行』要有ng舌根音，行『罌』，千祈唔好讀咗『痕』喎，『痕』係另外生理上皮膚反應。」

Goodbye Sir，大家識讀未？　

採訪：陳杰、Rick
攝錄：馮峰、Neo
攝影：陳俊強