呢期新股當旺，除咗有騰訊（700）親生仔閱文（772）之外，仲有電競概念股Razer（雷蛇），引起一眾機迷關注。做得電競產品設備商，當然離不開打機喇，可能有資深嘅機迷已經留意到，Razer個股票代號「1337」都係同打機有關，可以話係打機界嘅火星文！

點解咁講？其實1337係「Leet」咁解，本身係班駭客用嚟溝通嘅密碼，以免被行外人解讀到佢哋溝通嘅內容，後來慢慢拓展到遊戲領域。譬如話1337本身就係leet嘅密碼，1就好似細楷l，3有啲似大楷E，而7就好似T咁樣，取其形似；又譬如家陣機迷打完機興打「gg」，其實係「good game」嘅縮寫，都係Leet嘅一種。

其實中文都有Leet㗎，咪即係火星文囉，將啲字拆開嚟寫。譬如將「你好」打成「亻尔女子」咁樣，至於實唔實用就……見仁見智嘞。

話時話，閱文有騰訊光環，Razer都唔弱㗎，背後有「超人」李嘉誠照住，投資2,500萬美金認購咗Razer約1.08萬股D系列優先股。華華聽聞，超人嘅紅顏知己周凱旋今日會現身Razer投資者推介會。

周凱旋之前已經現身過超人旗下基金會有份搞嘅電競比賽，仲睇得相當投入，次次都咁盡心盡力，呢位紅顏知己認真唔話得！

蘋果財經，關心你飯碗
http://fb.com/appledailyatm