林嘉欣在其主演的電影《戀愛行星》中，結局是與男主角謝霆鋒陰陽相隔，而林嘉欣更需瞓在棺材演出。在外國長大的林嘉欣，對於首次瞓棺材，她日前接受訪問時，坦言有點害怕，她說：「拍嗰時OK，但拍之前有少少緊張同不安，不過好彩啲工作人員好好人，而導演更畀咗封利是我，以求安心。」
「寧可信其有」
林嘉欣續說：「霆鋒重教我喺拍完呢場戲後，返屋企之前要燒張白紙，佢話可以避免招惹啲唔好嘢，咁我都有跟住做，因為我唔食煙，落車時重專登問司機攞火機燒白紙，呢啲嘢寧可信其有，不可信其無。」
此外，林嘉欣最近人氣急升，她獲邀任最新一期女性雜誌《Jessica》封面女郎。林嘉欣穿上MiuMiu的一系列靚衫，盡顯青春氣息。
十五歲入行的林嘉欣，等了七年終於機會來了，獲星皓力捧，三套戲同期上映，她說：「捱咗七年都好，否則我十五歲時一定演唔到呢啲角色。」
自詡絕不好欺
外表活潑開朗的林嘉欣，經常笑容滿面，她說：「唔少人俾我個樣呃到，以為我外表好nice，好易『蝦』，其實我好堅強，有時都好執着。試過同事想說服我，但講咗幾次終於都放棄，因為我係唔易俾人說服嘅。」