iPhone 6上星期開放預售，令全香港幾乎所有辦公室變晒炒房。網上唔少人話，如果你炒機，就唔好怪人哋炒貴樓價、炒貴奶粉、炒黃子華飛云云。

我唔敢講炒機的人完全啱，但iPhone好明顯係奢侈品，同時你知道任何想買嘅香港人，短期內都可以用正價買番，所以要秤的話，炒機點都唔算陰質。
如果冇炒賣，呢個世界好多產物，根本反映唔到應有價值。而家主板殼炒到5億元，正反映殼非常渴市。
菲菲講到口水乾，市值幾億貨仔，公司前景又一般嘅，真係值得留意。最新心水典型老牌工業股利民實業（229）。公司持2.3億cash，冇債，加埋殼價公司最少值7.3億元。但最新市值4.5億元，你話係咪超抵！
講賣盤機會，而家工業難撈，公司上半年少賺16%；收入亦縮15%。基本因素唔樂觀。公司由黃英豪阿叔黃乾利揸旗，黃伯伯今年78歲，趁殼值錢，善價而沽動機再加一！就算真係唔賣，隻股每年都穩袋6厘息，真係手快有手慢冇。

Fifi
http://www.facebook.com/lovefrystock
本欄逢周二、四刊出