雖然呢隻《孖寶銀河》（SuperMarioGalaxy）條大橋又係老土到痹，講龜怪庫巴趁住流星祭典帶飛空艇艦隊嚟強搶桃公主，仲大膽到搬走整座城堡，令瑪利奧唔搏老命去死追爛追都唔得。但由於宿敵搞到銀河系立立亂，我哋呢位原本束手無策嘅主角幸得「眾星阿媽」Rosetta伸出援手，教曉佢點穿梭大小星球，務求收集被轟至四散嘅閃亮星星，最終目的當然係再次打敗呢隻大烏龜，同埋執晒散佈各地嘅百幾粒星啦！
除咗壽命逾十年嘅紅白機出過兩集之外，《孖寶》向來傳統都係「每代機一集」，因此《孖寶銀河》如無意外都係Wii嘅唯一正統作品。

喺未接觸過本作之前，好易聯想到3D動作遊戲通常會用好多個掣，咁得嗰兩三個掣嘅WiiRemote咪好大鑊？但其實當支遙控駁上「雞髀」Nunchuk之後，操作變化即時大增至連拍檔都可以幫手。例如平時向螢幕掃支遙控，執走版圖上四散嘅流星，以便儲夠50粒拎到1up，如今拍檔更可代辦呢種動作，加埋輔助大跳躍及射星嚟妨礙敵人等，將一個人嘅操作變成兩人分擔，都咪話唔盞鬼。
基本上角色嘅全方位移動，都係靠左Stick完全搞掂，跳躍則係遙控嗰粒A掣，當中全不涉及移動視點。乜話？3DGame唔郁視點都玩到？《孖寶銀河》正就正在呢度，佢喺唔改變視域嘅情況下照樣玩得順暢無比，兼且唔會轉到頭暈，任何人玩兩嘢都好快上手。

咪以為Wii得嗰480p極限輸出就係臘鴨，玩得靚唔靚只在乎開發者嘅功力，而人所共知嘅遊戲界鬼才宮本茂正是扭轉呢種觀念嘅表表者。縱使缺乏PS3或360嘅高清幼細線條，《孖寶銀河》好聰明咁將大量卡通色彩塞入班角色度，同充滿童話Feel的舞台背景非常匹配，更甚嘅係深藍色宇宙漫天星光，令人覺得好似置身於月球表面尋幽探秘咁款。

‧《GameWatch》主編葛葉Seven：「將Wii嘅體感簡單活現出嚟，不愧係任天堂。」

‧《GameNext》四哥：「舞台設計平衡度非常高，無論初學者或高手都可享受其中，不過有時行到星球底部操作會變得些微混亂」。

‧《GameWave》編輯萬次：「巧妙保留系列特色，以此基礎加入更多動作元素，成功營造獨特空間感」。

「如果係Wii用家就非玩不可，因佢貫徹咗宮本茂遊戲創作精髓，將好多表面微細但內裏非凡嘅點子重新演繹，令人對3D世界改觀。解謎部份取向正確，唔太難但要用啲腦，總好過使人卻步或者易到得啖笑。」

機種：Wii
廠商：任天堂
類型：ACT
人數：1人（2P協力）
日期：發售中
售價：$308
查詢：I-Gamer（27253338）