神劇《大時代》噚日凌晨重播大結局，大家依然追睇，《大時代》忠實粉絲導演郭子健睇咗《大時代》無數次，不過今次重播，佢依然每晚黐實電視，化身劇評人日日PO感想上FB。

由於《大時代》丁蟹掟仔落街，同方家被滅門，方婷方芳被掟落街嘅劇情太慘，所以《大時代》有好多版本，一係CUT咗方家姊妹被掟鏡頭，VCD同DVD版本都各有不同，但噚晚重播嘅大結局，四隻蟹被掟落街嘅鏡頭竟然cut走晒，只用慘叫去交代成件事，去到丁蟹仲用字幕交代佢「因為畏高，放棄自殺，得免一死」，但最搞笑係，呢個版本第一集時，明明丁蟹係跌咗落街，但因為Kick住條電線，成個人爆向方展博所在嘅樓層玻璃，雖然都係冇死，但同「放棄自殺，得免一死」好似唔連戲囉!

播完呢段之後郭子健就喺fb寫道:「哇！咁當做左嗱！唔係哇！」網民都鬧到「媽媽」聲，梗係啦，方家上下被丁蟹一家搞到滅門，足足39集過住「悲慘世界」一樣嘅生活，終於喺最後一集報應嚟啦!但竟然俾TVBCut咗!真係唔嬲就假，網民話:

「有無跳呀?去咗邊呀?其實係咪好似陳展鵬同關禮傑咁，跳咗去對面樓咋？？」
「x無線老x，難得有人仲睇你三色台，等咗成晚就係為咗呢幕，你竟然CUTx晒」
「比dvd版剪得更多，全部跳樓畫面都冇，投訴啊」
「我係gotv俾錢睇個場爽好多架喎，丁家一個一個跳，阿博就回憶番一個一個妹比人掟落樓..」
「幾年前經典台重播已經係cut到咁！」

郭子健就話:「其實大家咪xtvb，佢哋(唔係)冇剪嘢，佢哋只係冇做嘢啫！當年播俾人投訴得好勁，所以後面本來已cut曬的，所以當年細個仲嬲！在vcd其實算補原，因首播時是沒有丁家跳樓intercut加方家跌落樓回憶的！所以tvb而家只係播番以前的出街版，但好像第二次重播時都有野再剪過，我有92年版本6(錄)影帶，得閒再拎出來睇下有乜發現先！」

其實丁蟹個設定一定係怕死，但結局「放棄自殺，得免一死」，同首集即使佢冇心跳樓，但最後都係跌落樓爆玻璃冇死到，點都唔會叫「放棄自殺，得免一死」o掛?點睇都係唔連戲喎!

「大佬孝」邵仲衡今日喺電話話﹕「我都唔知DVD版係咪可以睇晒呢？又或者監製唔想第一集播完，最後一集重覆播。但個人喜好梗係有好過冇，有就full啲，依家好似有點兒敗筆，播長少少都好，好多人都係想睇嗰場。」