政圈最近再有風聲傳出，現任經民聯地產界議員石禮謙明年改選將會退位讓賢，上屆已傳過會出戰嘅富商趙世曾之子、自由黨發展及建造業關注組召集人趙式浩（Howard），一直被外界視為下屆潛在人選，「咁啱」佢今日親自領軍，帶隊到政總外向政府請願反對收緊差餉寬減，連行會成員張宇人都做「啦啦隊」，「又咁啱」該黨同日就成功爭取特首林鄭月娥承諾撤回措施，仲唔係為Howard出戰，省靚招牌？

八方問過Howard，佢話現階段都唔諗選舉住，因為自己都好忙，但佢又話最重要喺界別裡面繼續努力，幫業界爭取更多福利，仲話加入自由黨都3年，好希望繼續借呢個平台推動到惠及地產界以外，成個社會都受惠嘅措施。咁佢同業界關係又如何？Howard就話同業界關係都好好，有人一齊由細玩到大，一班長輩都由細睇到佢大，至於爸爸撐唔撐佢選？佢笑指自己做乜爸爸都好支持，但都係嗰句：「未諗住啊！」

咁石禮謙又係咪要退落來？大嚿石同八方講，自己係天主教徒，不會為明天憂慮，即係未講明退唔退，但又話歡迎業界有後生仔參選，仲話Howard都係佢「徒弟」，讚佢表現好，咁係咪意味可以交棒？佢就話民主選舉唔係講交棒，係選民支唔支持，同時更提到，自己大把「徒弟」喎，個個表現都好好，點名話立法會主席梁君彥嘅公子梁宏正（Clarence）都係徒弟仔，「佢係麗新（集團）非執董嚟㗎」，暗示佢有資格選地產界。

今年36歲嘅Howard先後取得加州州立大學富勒頓分校工商管理學學士學位及英國格林威治大學房地產管理學碩士學位，現為卓能集團非執董；Clarence則係39歲，英國劍橋大學經濟系畢業，宜家喺家族公司新興織造廠打拼。前者係重慶市政協、後者則係北京市政協，兩人無論年齡、學歷、家境、事業以至內地人脈等都不相伯仲。明年若然大嚿石「真」退，呢個點石成金嘅地產界代表議席，唔只富二代之爭咁簡單，仲係自由黨同經民聯大鬥法，唔知最後邊個跑出？