【新增影片】
北愛爾蘭球隊連菲特對蘇超班霸些路迪因為新教同天主教背景有所衝突，令呢個歐聯第二圈外圍賽matchup備受英倫球迷關注，首回合周五先喺連菲特主場上演，結果些路迪憑對手烏龍球，加上澳洲中場湯洛積建功贏2:0。雖然兩間球會賽前協議，作客嘅些路迪將不獲分配門票，仍有300位些路迪球迷到場聲援，最終亦獲准入場，慶幸雙方未有爆發大規模衝突。

不過，小插曲就少不免，除咗有連菲特球迷賽後衝入場指罵些路迪球員，客軍前鋒利治格菲斯喺下半場一次開角球期間，幾乎俾連菲特球迷掟出嘅玻璃樽擊中，反而慘被球證以拖延時間為由出示黃牌警告…結果些路迪贏波而回，格菲斯梗係寸得起，將些路迪嘅綠白頸巾綁喺主場門柱上「示威」！連菲特賽後亦發表聲明譴責有關行為，並承諮會徹查事件。

另外，歐聯第3圈外圍賽同日舉行抽籤，其中些路迪同連菲特嘅勝方，將會遇上愛爾蘭球隊鄧達克或者挪威球隊洛辛堡。至於由歐洲足協排名系數較高國家球隊出戰嘅「聯賽組」，焦點對碰落喺法甲球隊尼斯火併荷甲阿積士身上。

歐聯第三圈外圍賽抽籤（聯賽組）
布加勒斯特星隊（羅馬尼亞甲）vs柏辛域陀尼亞（捷克甲）
尼斯（法甲）vs阿積士（荷甲）
基輔戴拿模（烏超）vs年青人（瑞士超）
AEK雅典（希臘超）vs莫斯科中央陸軍（俄超）
布魯日（比甲）vs巴沙舒克伊（土超）
前者主場
首回合日期：7月25/26日
次回合日期：8月1/2日