陳家樂、麥子樂、湯加文噚晚喺荃灣出席電影《吉屋》首映，活動儀式上，家樂話自己鍾意睇鬼片：「可以天馬行空，變愛情或者喜劇都得，今次呢個似西式鬼片。」問到拍攝期間有冇遇過怪事？家樂話：「我一向拍鬼片都好正常，但呢部戲一開拍我就病，直到拍完至冇事。」

由於佢哋喺馬來西亞拍外景，所以家樂病時都係麥子樂照顧佢，子樂話：「之前同家樂同公司，但唔熟，係到呢部戲至開熟，一開拍佢就開始病，我似一個大哥哥照顧小朋友咁。」家樂話：「好多謝子樂，我初時只係喉痛、發炎，之後就發燒出智慧齒，出完再發燒，後尾喉龍發炎又失聲，有場戲我同子樂嗌交，我因為講唔到嘢，都只係做口型。」

家樂嘆氣話去大馬拍戲，除咗喺酒店瞓覺，就係去片場開工，冇去過玩，子樂笑話：「我哋都冇去玩，只係一次去雲頂拍戲，因主要係家樂嘅戲份，我哋玩咗陣，湯加文教我玩輪盤，結果贏咗幾百蚊，我哋買咗榴槤返去同劇組分享。」

家樂又話到呢部戲係佢嘅翻生之作：「拍完呢部戲之後，我同子樂即刻多咗好多工作，喺大馬見到個導演，又接咗另一部鬼片，忙到o依家。」而佢哋亦因此成為好友，問到兩個男人平時有冇傾心事？子樂即搶住話：「好少傾，心照，唔使講出口。」

精選娛聞，喺晒《娛果》
http://fb.com/appledailyent