有咩慘過屈居亞軍？就係連續兩次屈居亞軍！繼上月威爾斯桌球賽決賽以8:9僅負冰咸，英格蘭球手鄧立普喺周日直布羅陀桌球賽決賽，兩度領先局數下以2:4不敵同胞梅菲，二奶命難違！

雖然梅菲氣勢強勁，4強接連打出140同137度下橫掃尼祖邦特4:0晉級，但鄧立普憑兩cue「half century」59度同84度，領先過1:0同2:1，可惜無以為繼，包括第6局打出34度後打失「薄皮」紅波，最終俾梅菲以一cue 96清枱反勝局數4:2，贏得職業生涯第7個排名賽錦標，兼袋走25,000歐元（約20.6萬港元）冠軍獎金，佢賽後表示：「我喺整屆賽事遇上唔少硬仗，咁樣反而令我以更佳狀態出戰決賽。鄧立普可能係當今世界最佳球手，佢精通所有技術，所以我知道要有出色發揮先贏到佢。」