下半年樓市剛開始，今年初，曾預計未來兩年樓價升兩成的中原集團主席施永青，再為樓市把脈。他稱，新盤過去半年來不斷加價，加幅跑羸大市，已試到阻力位，令新盤出現「食滯」情況。

施永青表示，今年農曆年後樓價明顯向上，發展商每開一次盤就加價，加幅亦大過中原樓價指數反映二手市場的升幅，加得多總有試到阻力位的機會，5、6月已經試到阻力位，如啟德新盤呎價已過了二萬一、二萬二，買家入市意欲就會被新的價錢嚇窒，「咁有啲盤其實開咗之後賣咗一部份之後就慢咗落來」，未見像之前兩、三個星期就清晒的熱賣情況，顯示某些價錢已遇到抗佢。

此情況下，發展商須面對現實，「如開返上次價錢可能會面對擠喺度賣唔出，但要開低些，點開法有一定難度，如開得低，老細會問你點解開咁低，人哋都唔係開咁低，但如果唔開低仲要加啲上去，營業部都會好清楚賣不出，賣不出難向老細交代。」施永青預期，新盤已出現「食滯」情況，未來一段時間發展商開盤量會放慢，如銷情仍未見理想，或須要研究新策略。

（發展商會平價開盤？）施永青直言，要抵過之前，但大部份發展商都不想給人感覺減價，而減價亦有可能會嚇親買家，「會整啲筍啲平啲（單位）」，並非直接減價，而是上次推出的單位不太靚，但今次推靚貨，但整體價格無變，但營造出現「抵買」促銷效應。以前發展商賣樓，難去貨的時間就會採會這種賣樓策略。

展望下半年樓市，施永青認為樓價未有條件向下走，最多橫行或微調，等買家力量積聚再上，始終樓價短時間升得快就會抗拒﹔買家亦仍具實力，「實力就是睇你荷包有冇錢，但我認為目前荷包仲有錢，雖然有啲人荷包冇錢，市場上唔須所有人都有錢，例如鮑魚同鑽石，一般好多人買唔起，但唔係冇人買，唔須個個都買。」

他指出，目前一手樓主導市場，如一手樓賣得不好，會影響二手樓冇咁強硬，二手樓價會回落少少，但今次回落不認為是勢頭的改變，只是急升後的調整，「試完阻力位落來，再試支持位」。他預計本月及下月樓價會跌2%至3%。

被問到中原集團香港業務，施永表示，6月份中原地產賺少少，利嘉閣則錄得虧損，若淡市持續下去，行內出現虧損情況會增加，其主要競爭對手發出盈喜，但能否維持至下半年就會有壓力。

記者:朱連峰

掌握財經生活資訊，即Like「蘋果ATM」fb專頁啦！
http://fb.com/appledailyatm