已經卸任嘅好耐「十優港姐」麥明詩，唔知點解，係佢身上總係有啲奇奇怪怪嘅事發生，勝又勝在，佢啲答案好有「智慧」，一般人未必會咁樣處理，亦未必有同樣效果。

講緊嘅係今日喺facebook專頁《Don Kong的士司機資訊網Taxi》中，有的士司機開po寫低話：「1440接載『過氣香港小姐』麥X詩由尖沙咀（嘴）去佐漾日居，全程車資$44.40。你比（俾）$100我找番$55.60比（俾）你，特此聲明：係你話唔要$0.60散子。」

就係咁，match番條件，事主呼之欲出，即係麥明詩。其後麥明詩都有轉發呢個post回應，佢講到「用電子收費就唔使煩」，又話「十年唔搭一次的士，一搭就出事」，不過最後疑似原po刪帖，所以連麥明詩個轉發都消失埋……

麥明詩今日接受傳媒查詢時，坦承事主係自己，仲話其實好小事，佢回覆傳媒時話：「其實成程的士都好順利，冇任何拗撬。應該係其他藝人po過話的士司機唔找足，所以佢保障自己話自己有找足零錢，係我自己話唔要零錢。」

哦，麥明詩講緊嘅會唔會係王喜喺今年8月話自己搭$39.30的士，對的士司機只係找$60感不滿一事（新聞連結： http://bit.ly/2vC86X3 ）。

麥明詩認為今次的士司機嘅做法係無可厚非，但佢就覺得「唔需要公開我嘅路程」，對於呢一點，麥明詩就笑言：「好彩我唔係去理想酒店啫……」

係囉，好彩咋！