林峯同吳千語嘅5年情玩完，千語BB傳移情百億富三代、前全國政協兼地產商施子清嘅長孫Brian，林峯就同強國D cup車模張馨月疑相睇，上個禮拜一，林峯暴瘦現身認和平分手，曾經講過7次「好愛」千語BB嘅林峯，成個人落晒形！（新聞連結： https://bit.ly/2DBVK1y ）今晚就輪到千語BB分手後，首次喺活動現身去到銅鑼灣出席時裝活動，佢個樣就好精神飽滿噃!

問到千語BB心情好番未？明顯已經放低咗嘅佢話：「其實都一段時間啦，OK嘅，多謝大家關心，早陣子放假，有少少休息時間，過年前拍咗兩套劇，嚟緊都會拍劇拍綜藝節目，仲有網絡電影。」問到係咪同林峯有共識？由男方交待分手？千語BB承認：「係，大家有共識，不過唔講嘞，講多錯多，總之分開咗一段時間。」追問係咪有第三者？佢就話：「係兩個人之間嘅事，其他都講晒，人要向前望，希望專注工作，o依家唔想諗感情住。」

咁識唔識林峯疑似新歡張馨月呢？千語BB話：「唔識，不過有睇報道，人哋嘅嘢我唔答啦。」咁問到佢係咪同富三代拍拖，千語BB就話：「成日都咁講㗎啦，影到我哋食餐飯又咁講，其實係男性朋友，每逢有男性朋友在場，o依家都會避忌啲，男仔唔會坐我隔籬，費事畀人話。」千語BB仲宣布：「我o依家單身，覺得幾好。」問到ready拍拖未？佢表示：「o依家想一個人先，冇人追。」仲轉話題表示：「o依家投入工作狀態，舊年有5個月喺橫店拍劇，以前一個人會有少少驚同擔心，但o依家覺得一啲都唔辛苦。」

記者再追問分開嘅原因係咪聚少離多？佢避答：「都過去咗啦。」至於有傳林峯屋企人唔鍾意千語BB，佢就否認：「唔關事，係我哋兩個人之間嘅事。」屋企人有冇擔心你？佢話：「冇呀，有時唔工作都會去旅行，我都係正常咁生活，冇乜大變化。」

至於宣在分手當晚，千語BB去咗紅館睇周杰倫演唱會，喺粉絲點唱環節千語BB唱《彩虹》，唔知係咪憑歌寄意呢？佢又否認：「唔關我事呀，首歌唔係我揀，自己都好緊張，唱歌又唔係好聽，周董好多都係情歌，冇特別意思嘅。」

最後問同林峯係咪再見亦是朋友？千語BB諗咗一、兩秒：「係...係...係」

精選娛聞，喺晒《娛果》
http://fb.com/appledailyent