林日曦的媽媽日前離世，林日曦今日在facebook貼了一張有樹有天，天色陰暗的相片，表達悲哀心情，但「腦細」林日曦仍然表現豁達說：「你估我唔知點解你要突然走咗去咩？你放心啦，呢排我同老竇勁friend。」林日曦透露爸爸開口埋口都是媽媽，例如：「你阿媽鍾意食羊扒」、「以前同你阿媽會落街散步」、「你阿媽鍾意呢張相」、「你阿媽唔鍾意百合」、「你阿媽好怕大煙」，不禁說：「我而家先知道，原來佢係咁深情、咁愛你。」

林日曦表示近排工作太忙，加上「病病地」，所以狀況麻麻地，他說：「但我當呢個考驗係個game，每日打大佬每日過版，其實過過吓又OK。總之我應承你，呢世人我點都會扮返一次乖仔。以後我會照顧好老豆，老豆都會照顧好我；我同家姐又會互相照應；而且有好多好人用唔同方式陪伴我哋幫助我哋；所以，你不必再掛心。」平時外表Cool爆的林日曦都想同媽媽說一聲「我愛你」，但最後覺得太肉麻收回：「從來冇親口同你講過呢三個字，而家你畀我喺網上扮下孝順仔啦：『媽，我......」算啦都係太肉麻，下次見到你再親口同你講。係咁。」

不少網民都留言表示關心，杜汶澤更留言說「Love You」表達慰問，林日曦再說：「感謝大家，我冇事，只係忍唔住抒發下 X up(噏)下，我頂得住有餘！」