當年今日

附屬診所乜牌都唔使搞
樟木頭16萬開按摩院

蘋果日報 2002/04/25 00:00


大陸按摩院可謂多得不計其數,要在巿場分一杯羹並非容易。年過半百的香港師奶周太,盲舂舂拿着十六萬,在毫無創業經驗下,卻能在「小香港」樟木頭站穩陣腳。這間在由港人開辦的鐵路診所盲人按摩院,靠的正是在那兒居住的十多萬香港人,以及一個接一個的經歷,使她愈戰愈勇。

記者:陳淑君 攝影:楊錦文
創業天時地利
公司倒閉 師傅投緣
周太跟按摩師的緣,早於九三年建立。「我經常同丈夫去深圳及樟木頭按摩,久而久之,佢對一些穴位知識亦豐富起來,跟一些按摩師也很投契。九八年,這些師傅被舊公司積壓四個月工資,便辭職去深圳打工,但工作不如意。九九年底,我做了近八年會計的貿易公司倒閉,我便拿點積蓄開舖頭,也順理成章找以前啲師傅幫手。」

診所遷址 牌照出租
由樟木頭火車站步行往周太的按摩院,其實只需五分鐘,但也算地點偏僻,皆因甫踏出火車站,已見幾間盲人按摩院,競爭劇烈。而周太的按摩院是附屬位於先威大道的廣深鐵路股份公司鐵路診所按摩理療科。「本來我都想去巿中心如華富廣場開舖,但冇牌照唔成事;後來聽說鐵路診所由火車站搬去現址,牌照由佢哋租畀我,?5,700承包,包括所需牌照及第一個月租金,我只需簽份合同,乜都唔使搞,所以咪試吓囉。當時都有其他人爭,但負責單位知道我哋唔搞色情,清潔衞生亦比內地人做得好,所以我哋成功爭取到牌照開舖,但今年年底便夠三年傾續牌嘅事。」
困難浪接浪
1.人地生疏 裝修貴一倍
因舖位只得七百呎,遂另租地下一間房及二樓一個單位,總面積1,460呎,容下二十張按摩床。當時他們人地生疏,不諳熟人介紹,雖然只要求簡單裝修,但已花掉八萬多,周太說換轉現在,分分鐘平一半。

2.被唱撬牆腳 開市冇生意
最初周太跟四位資深按摩師傅一齊打天下,以為開張大吉,誰知門庭冷落。「因師傅曾離開往深圳打工一年,熟客都唔知佢哋返咗嚟;初時更被佢哋以前嘅老闆唱我撬牆腳。頭大半個月都冇乜客,惟有叫師傅出去搵客。
「第一個月得200個小時生意,第六個月先收支平衡,第九個月開始賺到幾千蚊。」如今憑口碑,累積過千位熟客,九成為香港人。」
3.平凡裝修 內地師傅不願留
開業不久,周太招聘多五位靚女師傅,結果好傷心。「佢哋要求畀?700至?900底薪,當時我照畀。但呢度裝修唔豪華,唔似其他地方搵大錢,佢哋做得唔安心。出完糧即刻走咗四個!當時好傷心,後來諗通佢哋都只不過嚟搵錢啫。
「𠵱家請人都要揀老實嘅,除咗要有證書同親身嘗試佢哋手勢之外,重要有耐性先請。」

4.半桶水師傅 隨便話放血
師傅首年需付?500按金,所有師傅亦需每年續約,她亦着緊員工的表現。「有個二十多歲師傅好驕傲,在客人面前吹噓自己手勢,話客人有乜乜病,有啲重話要同客人放血,真係嚇死人!」
現在二十二位師傅,全部皆畢業自山西或江西省的盲人按摩學院,一半更正式修讀三至四年課程,對中西醫、針灸、拔罐、腳底按摩等具備相當知識,如此才可增強客人信心,留住熟客。
投資金額
投資日期:1999年12月
租金 ?12,600(承包費用、1,460呎舖面和宿舍租金連按金及1個月上期)
裝修 ?120,000
22位師傅人工 ?24,000(以每小時15元工資,按每月共有1,600小時生意計算。)
雜項 ?5,000(包括水電費、派鐘管理員、廚師、購買清潔用品等)
流動資金 ?3,000
總投資額 ?164,600
近三個月平均營業額 ?56,000
平均每月盈利 ?13,000
企業文化守則(部分)
三個一樣:
-新客和老客一樣
-本地客、台灣客和港客一樣
-有無小費一個樣
三個努力方向:
-師傅做到「手法精,品德高,有愛心」
-無論老闆、行政人員還是師傅,人人都講究服務態度,待客熱誠有禮周到
-保持環境衞生整潔

管理策略
1.企業文化 建立誠信
為了令所有員工明白公司運作,提高士氣與質素,周太特定了一套管理模式的規則(見上表),張貼於舖內,務求所有師傅能做到「專業、敬業、誠信與親切」,不貪小便宜。
2.薪高糧準 留住好師傅
樟木頭一帶的按摩師傅工資為每小時?12,但這兒則為?15,每月工資起碼多幾百元人民幣。此外,這兒也是每個月一號出糧,絕冇拖欠工資。
3.提供食宿 添歸屬感
周太在鐵路診所租了三個單位,為單身師傅免費提供住宿,夫妻檔及主管則有獨立房間,但須每月收?100租金。還有廚師負責他們三餐伙食,每人每月收?180,有時也會按師傅的要求炮製膳食。
4.管工收錢 避免不公
由於周太有一半時間不在樟木頭,所以聘請兩位管工管理業務。其中一位廣州林先生,在樟木頭住了12年,熟悉本地環境,更是鐵路公司職工,主要在晚上幫手排鐘同收錢,因為部分師傅是盲人,怕有人做手腳不公平;有時也會幫手洗床單、執垃圾等。
小心陷阱
東莞不再發牌
周太曾花了大半年時間去搞牌照,但幾乎被人騙財。「透過朋友介紹,知道有人可以幫手,我哋半年內送煙又請食飯,以為信得過,但佢竟開價十萬,話搞臨時牌。後來同相熟按摩師傾開,才知東莞唔再發按摩院牌照,覺得奇怪,最後先知佢專呃香港人,重俾人拉咗去坐監。」若仍有港人還希望在東莞開按摩院,惟有跟持牌單位租牌或等人轉手。
未來大計
鄰近建高樓 繼續擴充
雖然現在每月盈利只得萬多元,但周太笑稱:「賺多少唔緊要,喺呢度幫到客人,認識多啲投契朋友傾偈已滿足。診所鄰近將會再起高樓,佢哋話起好會租畀我哋,我諗住再租個地舖,到時或者唔使再租二樓單位。」
熟客感受
㗎仔杉田晉:
「我在日本負責製造Figure,膊頭同背部經常出毛病,我有一半時間留喺中國,有次透過朋友帶我嚟呢度,做完真係好好!喺日本做一次按摩,三十分鐘已經要?200呢!」(此處每小時?35。)