喺香港，男球迷真係唔易做，一個月幾百蚊月費睇英超，要女友或者老婆陪你睇波真係難過登天，如果佢哋要追《武則天》，分分鐘會霸埋部電視搞到冇得睇波。不過一位英國阿仙奴球迷就威水好多嘞，佢就向女友開出關於阿仙奴嘅考卷，要女友考試合格先會繼續同佢拍拖。

一位叫Saskia嘅英國女仔，日前就喺自己嘅Twitter戶口上載幾張阿仙奴考卷，佢唔係要考入阿仙奴球會做嘢，而係佢嘅超級廠迷男友整出嚟考佢，如果唔合格就飛咗佢。考卷亦都有深有淺，淺嘅係答吓件黃色波衫係主場定作客，列出阿仙奴11個正選陣容，都叫難難地，Saskia都好叻，答到10個。最難就係分析題，叫Saskia講吓「山神」阿歷斯山齊士，點解勁過今季球員先生、車路士中場夏薩特，呢題真係怕且連雲格都考起。埋單一計，Saskia都答啱87%，50分滿分拎到43.5分，男友仲好寸咁講：「做得好，Saskia，我決定唔飛你啦。」
其實Saskia男友下下用考試嚟嚇只會有反效果；最好就梗係等女友鍾意阿仙奴啦，好似山神咁，又靚仔又好波，最近幫剃鬚刀拍廣告仲露埋點㖭，點會吸引唔到女粉絲。