當年今日
關於我們

【快啲問下管理處】唔係人人有得睇 奇妙電視將先以「固定網絡」播放

蘋果日報 2017/02/09 18:26

奇妙電視固定網絡

最後一間獲發免費電視牌照嘅奇妙電視將會喺5月開台,而喺今日通訊事務管理局亦有發出新聞稿,指出奇妙電視將會按照其免費電視牌照規定,於今年五月三十日或之前使用固定網絡推出其免費電視服務。
不過,新聞稿中提到:「通訊事務管理局(通訊局)今日(二月九日)公佈,就奇妙電視有限公司(奇妙電視)提出申請,讓其除了可使用固定網絡外,亦可使用頻譜作為新增傳送模式,以提供本地免費電視節目(免費電視)服務一事,通訊局已應奇妙電視的要求,暫緩處理該項申請,直至奇妙電視於其免費電視服務啟播後可重啟與通訊局的商討為止。」咦!唔係要開台咩?點解又講到「暫緩處理該項申請」。
新聞稿中講到奇妙電視原來喺去年向通訊局提出申請除咗「固定網絡外,亦可使用頻譜傳送其持牌免費電視服務」,不過經過商討後,奇妙電視喺今年一月主動陳述會專注喺固定網絡推出免費電視,之後先會再同通訊局商討使用頻譜傳送。
咁「固定網絡」同「頻譜傳送」又係啲咩嚟呢?「固定網絡」就係即係奇妙電視會使用有線電視固定網絡系統播放,而「頻譜傳送」即係好似TVB同ViuTV一樣係由數碼頻譜嚟傳送,即係只要買部數碼電視或機頂盒就可以睇到。
換句說話嚟講即係要安咗有線電視固定網絡系統嘅大廈或物業,先至可以喺5月開台睇到奇妙電視節目,唔係人人睇到!