結束1,400多天破產生涯後，鍾鎮濤重獲新生，除了買六合彩和剪髮驅走衰氣外，這幾天也忙於相約老友飯敍慶祝。前晚女友范姜便與兩位圈外好友為他在尖沙嘴一間酒吧舉行慶祝會，出席的嘉賓包括溫拿成員譚詠麟、彭健新、林建岳、梁漢文及鄭中基等。阿倫特地送上筆記簿和筆給阿B，他說：「送本簿畀佢記低美好嘅生活，等佢可以一切重新開始。噚日阿B一早請咗我同健仔去佢屋企食花膠，我哋傾咗好耐，覺得阿B睇化好多，變得好平民化。」

由於阿B事前是不知有這個派對，故顯得非常感動，當志偉拉着他與范姜上台合唱《隨想曲》時，兩人更激動得相擁而哭。阿B接受訪問時表示由於自己不擅理財，故財政大權都交在女友手中，他說：「𠵱家惟有孤寒啲，因為自己理財唔叻，經過呢四年，金錢係好重要，但唔係最重要，因為冇咗可以再搵，而朋友、家庭同健康冇咗就搵唔番，所以呢啲先係最緊要。」
阿B續說：「以後我唔會再亂信人，仲會識得珍惜好多嘢，不過有啲人喺我出事時就變臉，呢啲人以後就唔使關心。」
此外，破產管理署早前向法庭申請頒令，禁止阿B與前妻章小蕙任公司董事，昨日法庭正式頒令禁阿B三年內不得擔任董事，而章小蕙因一直未有回應署方指控，故被頒令禁任董事五年。
採訪：藍文浩　攝影：陳順禎
案件編號：HCMP2607/05