勝者為王，敗者為寇，華懋同陳振聰係最好嘅寫照，聞說華懋慈善基金向高院申請臨時禁制令，繼續追擊陳振聰，凍結佢名下嘅資產，市場亦以行動支持華懋，「甜甜三寶」又再一次炒上，當中視作華懋系嘅安寧（128）同丹楓（271）噚日分別升逾一成。

舊年世紀爭產陳振聰慘敗後，消息指為怕陳會走數，華懋慈善基金向高院要求凍結陳名下1.41億嘅資產。基金先前喺土地註冊處登記凍結令，令陳無法出售或按揭估值約5億元嘅楠樺居地皮。
每次陳振聰單嘢有新進展，「甜甜三寶」都無厘頭爆升，好似噚日咁，安寧收報0.7元，升14.8%；丹楓收報0.75元，升11.9%；而陳振聰有份持股嘅宏霸數碼（802）收報1.01元，升7.5%。
呢三隻嘢加埋成交超過1.7億，仲勁過華懋要求凍結嗰1.41億資產。