由張晉主演嘅新戲《葉問外傳：張天志》，獲今屆釜山電影節選為閉幕電影。將於今年10月4日舉行嘅「第23屆釜山國際電影節」今日公布入圍名單，多部台灣電影有份入選，至於開幕電影為韓片《Beautiful Days》，由李娜英主演。

電影《葉問外傳：張天志》係張晉繼《葉問3》中飾演「張天志」嘅角色延續，今次由張晉擔正之外，仲搵來佢嘅恩師袁和平執導，並由黃百鳴、甄子丹聯合監製，電影預計今年底上映。今日獲知該片選為閉幕電影，張晉興奮話︰「我剛落機就收到消息，好興奮，今次仲要係同師傅八爺合作，可以將功夫動作帶到唔同國家，大家又喜愛，真係好開心。」該片除了兩師徒外，仲有曾演出《007：鬼影帝國》嘅Dave Bautista、楊紫瓊及Tony Jaa演出，戲內仲有大家熟悉嘅港產演員鄭嘉穎、周秀娜、譚耀文等助陣。

今屆釜山國際電影節，多部台灣電影入選，包括邱澤首次喺「第20屆台北電影獎」封帝嘅《誰先愛上他的》（相關新聞︰ https://bit.ly/2PC3JSC），五月天石頭露股上陣《幸福城市》，導演蔡明亮執導《你的臉》及《十年台灣》等皆入選「亞洲電影之窗」單元。而張藝謀《影》、賈樟柯《江湖兒女》、黃渤《一齣好戲》同樣入選「亞洲電影之窗」。至於關錦鵬《八個女人一台戲》則入選「大師放映單元」。至於台灣嘅劉以豪、陳意涵主演《比悲傷更悲傷的故事》，同大陸徐崢主演《我不是藥神》則入圍「Open Cinema」單元。

精選娛聞，喺晒《娛果》
http://fb.com/appledailyent